अपणि भाषा तैं मिलु संवैधानिक अधिकार-उत्तराखण्ड लोक भाषा साहित्य मंच दिल्ली द्वारा हस्ताक्षर अभियानै शुरुआत।
नै दिल्ली : इतवार 11 सितम्बर, 2022 खुणि गढ़वाल भवन बिटिन उत्तराखण्ड लोक भाषा साहित्य मंच दिल्ली द्वारा गढवाळी-कुमाउनी भाषाओ तैं संविधानै आठवीं अनुसूची म शामिल कना खातिर हस्ताक्षर अभियान शुरू करेगे। मंच का संयोजक श्री दिनेश ध्यानी, मंच का संरक्षक श्री अनिल पन्त बरिष्ठ साहित्यकार श्री जगमोहन सिंह रावत, बरिष्ठ रंगकर्मी श्री दर्शन सिंह रावत, युवा कवि श्री अनूप सिंह नेगी खुदेड़, श्री वीरेन्द्र जुयाल ऊपरी समेत कै गणमान्य लोगों न हस्ताक्षर की शुरूआत कैरी। मौका छौ गढ़वाल हितैषिणी सभा दिल्ली द्वारा कक्षा 10 अर 12 दर्जा म नब्बे प्रतिशत से बंड्या नंबर लौंण वाळा लगभग 160 प्रतिभावान बच्चों तैं पुरस्कृत करेगे जु भौत सराहनीय पहल चा। सभा विगत कै सालों बिटिन प्रतिभावान बच्चों तैं पुरस्कृत करणी चा। सभा का अध्यक्ष श्री अजय विष्ट, महासचिव श्री द्वारिका प्रसाद भट्ट समेत पूरी कार्यकारणी ये वास्ता बधाई कि पात्र चा।
ये मौका परैं उत्तराखण्ड सरकार का उच्चशिक्षा व स्वास्थ्य मंत्री डॉ धन सिंह रावत तैं एक ज्ञापन सौंपे गे जै म गढवाळी-कुमाउनी भाषाओ तैं संविधानै आठवीं अनुसूची म शामिल कना खातिर उत्तराखण्ड सरकार द्वारा विधानसभा सदन म ये सम्बन्ध म चर्चा का बाद एक प्रस्ताव पास कैरि कि केंद्र सरकार तैं भ्यजणा मांग करेगे। डॉ धन सिंह रावत न बोलि कि ये सन्दर्भ म उत्तराखण्ड सरकार सकारात्मक पहल कारलि।
रुद्रप्रयाग का पूर्व डीएम व वर्तमान म प्रधानमंत्री कार्यालय म उप-सचिव श्री मंगेश घिल्डियाल तैं भी एक ज्ञापन मंच द्वारा सौंपे गे। जैम श्री घिल्डियाल से अनुरोध करेगे कि केंद्र सरकार से गढवाळी-कुमाउनी भाषाओ तैं संविधानै आठवीं अनुसूची म शामिल कना खातिर सकारात्मक पहल करेजौ। श्री घिल्डियाल न बोलि कि उत्तराखण्ड लोक भाषा साहित्य मंच दिल्ली द्वारा गढवाळी-कुमाउनी भाषाओ तैं संविधानै आठवीं अनुसूची म शामिल कना खातिर जो ज्ञापन 12 अप्रैल खुणि सरकार तैं सौंपी वु ज्ञापन सरकार का संज्ञान म चा। यी दिशा म तकलगैकि जु ह्वै साकलु टक लगैकि करला। वों न बोलि कि आप लोग सतत संघर्ष कना छावा या भलि बात चा।
ये मौका परैं गढ़वाली-कुमाउनी-जौनसारी भाषा अकादमी का नवनिर्वाचित उपाध्यक्ष डॉ कुलदीप सिंह भण्डारी, अकादमी का सचिव व बरिष्ठ साहित्यकार डॉ जीतराम भट्ट, उत्तराखण्ड जागरण के संपादक श्री सतेन्द्र सिंह रावत, अकादमी की सदस्या श्रीमती संयोगिता ध्यानी,श्रीमती यशोदा घिल्डियाल, सुश्री प्रेमा धोनी, श्रीमती बबली ममगाईं समेत कै लोगों न उत्तराखण्ड लोक भाषा साहित्य मंच दिल्ली द्वारा गढवाळी-कुमाउनी भाषाओ तैं संविधानै आठवीं अनुसूची म शामिल कना खातिर करीं पहल कु स्वागत कैरी।
ये मौका परैं लगभग द्वी सौ से बंड्या लोगों न ज्ञापन म हस्ताक्षर करीं। खासकर नै पीढ़ी का नौनिहालों कि सहभागिता मुख्य रै।